ပါကစ္စတန်ရေဘေးဒုက္ခသည်တွေအတွက် သီတဂူဆရာတော်ကြီး ငွေလှူဒါန်း

ပါကစ္စတန်နိုင်ငံမှာ ဖြစ်ပွားနေတဲ့ ရေဘေးအန္တရာယ်ကြောင့် စားဝတ်နေရေးနဲ့ နေထိုင်ရေး အခက်အခဲ ဖြစ်နေသူတွေအတွက် သီတဂူဆရာတော် အရှင်ဥာဏိဿရ က ဒီနေ့ ပါကစ္စတန်သံရုံးကို အမေရိကန် ဒေါ်လာ တစ်သောင်း လှူဒါန်းခဲ့ပါတယ်။

နိုင်ငံ၊ လူမျိုးနဲ့ ကိုးကွယ်ရာဘာသာတွေ မတူကြပေမဲ့ အများနဲ့ဆိုင်တဲ့ပြဿနာတွေ ဖြစ်လာရင် ၀ိုင်းဝန်းဖြေရှင်းပေးရမှာဖြစ်ကြာင်း သီတဂူဆရာတော် အရှင်ဥာဏိဿရက မိန့်ပါတယ်။

"ပါကစ္စတန်တို့၊ အိန္ဒိယတို့၊ မြန်မာတို့ဆိုပြီးတော့ နိုင်ငံတွေနဲ့ လူမျိုးတွေကိုးကွယ်တဲ့ဘာသာ လူမျိုးတွေမတူကြသော်လည်းပဲ ပြဿနာတွေဖြစ်လာတဲ့အခါကျတော့ အားလုံးလူပဲ၊ ဟိုမှာရေနစ်တယ် ဗမာပြည်လည်း ရေနစ်တာတွေ ရေကြီးတာတွေအများကြီးပဲ ၊ ရေနစ်ခြင်းဆိုတဲ့ပြဇတ်မှာ ဗမာဗုဒ္ဒဘာသာမှာဖြစ်သလိုပဲ၊ အစ္စလာမ်၊ ပါကစ္စတန်မှာလည်းဖြစ် တယ်၊ အစ္စလာမ်၊ ပါကစ္စတန်နဲ့ မြန်မာဆိုတဲ့ ဝေါဟာရ မတူညီတာလေးကို ခဏဖယ်ထား လိုက်ရင် ရေနစ်ခံရခြင်း၊ ရေမြုပ်ခဲ့ရခြင်းဆိုတဲ့ဒုက္ခဟာ အားလုံးနဲ့ဆိုင်နေတယ်၊ အများနဲ့ ဆိုင်နေတဲ့ အဲ့ဒီပြဿနာ ဝိုင်းဝန်းပြီးတော့ အများသဘောတူဖြေရှင်းပေးရမှာ နိုင်ငံတိုင်း၊ လူမျိုးတိုင်းမှာရှိရမယ့် တာဝန်ပါ"

ပါကစ္စတန်နိုင်ငံမှာ ဒီလဆန်းကစပြီး ရေကြီးရေလျှံခဲ့တာကြောင့် လူဦးရေ ၃၀၀ ကျော် သေဆုံး ခဲ့ပြီး သုံးသန်းနီးပါးဟာ အိုးမဲ့အိမ်မဲ့ ဖြစ်နေတယ်လို့သိရပါတယ်။ အိမ်ခြေ လေးသောင်း ခွဲကျော်နဲ့ လယ်မြေဧက တစ်သန်းကျော်လည်း ပျက်စီးသွားတယ်လို့ မြန်မာနိုင်ငံဆိုင်ရာ ပါကစ္စတန်သံအမတ် Mr.Ehsan ULLah Batthက ဆိုပါတယ်။
RFA Burmese