မူလတန်းပြဆရာမနဲ့ ကျောင်းအုပ်ဆရာမကြီး အပြန်အလှန်တရားစွဲ

စစ်ကိုင်းတိုင်းဒေသကြီး စစ်ကိုင်းမြို့ အမှတ်(၇) အခြေခံပညာမူလတန်းကျောင်းက ဆရာမ ဒေါ်ဌေးဌေးဝေက ကျောင်းသားသမဂ္ဂလှုပ်ရှားမှုတွေမှာ ပါဝင်ခဲ့တဲ့အတွက်ကြောင့် ကျောင်းအုပ်ဆရာမကြီးက သူ့ကို ကျောင်းပြောင်းခိုင်းတဲ့အတွက် မကျေနပ်ကြောင်း ပြောကြားလိုက်ပါတယ်။

ဆရာမဒေါ်ဌေးဌေးဝေက စစ်ကိုင်းမြို့မှာ သတင်းမီဒီယာသမားတွေနဲ့ ဒီကနေ့ တွေ့ဆုံစဉ် အခုလို ပြောခဲ့တာဖြစ်ပါတယ်။

ကျောင်းအုပ်ဆရာမကြီးရဲ့အမိန့်စာမှာ လိုအပ်ချက်အရ ကျောင်းပြောင်းခြင်းဖြစ်တယ်လို့ ရေးသားထားပေမယ့် အမှန်မှာတော့ ကျောင်းသားသမဂ္ဂ လှုပ်ရှားမှုတွေမှာပါဝင်ခဲ့လို့ သူ့ကို ပြောင်းရွေ့တာဖြစ်တယ်လို့ ဆရာမဒေါ်ဌေးဌေးဝေက ပြောပါတယ်။

"အဲ့ဆရာမက ကျောင်းသားသမဂ္ဂတွေမှာ ဦးဆောင်တာဟုတ်ပါသလားတို့၊ အဲ့ဆရာမက အခမ်းအနားတွေမှာ ချီတက်တာ ဟုတ်ပါသလားတို့ဆိုတာကိုတော့ ဆရာမကိုတိုက်ရိုက်မပြောပဲနဲ့ ပတ်ဝန်းကျင်မှာ အရပ်စကားပေါ့၊ အဲ့ဆရာမက နိုင်ငံရေးတွေလုပ်တယ်၊ အဖွဲ့အစည်းပေါင်းစုံတွေနဲ့ ပေါင်းတယ်ပေါ့နော်၊ အဲ့လိုပြောပေမဲ့ ဆရာမက ဂရုမစိုက်ခဲ့ပါဘူး၊ တိုင်းပညာရေးမှူးစစ်တဲ့နေမှာတော့ သက်သေကိုတော့ အဲ့လိုတွေမေးတယ်တဲ့၊ အဲ့ဒါကြောင့်မို့ ဆရာမကသိရတာ"

ကျောင်းအုပ်ဆရာမကြီးက ပြီးခဲ့တဲ့ စက်တင်ဘာလကတည်းက ဆရာမဒေါ်ဌေးဌေးဝေကို ကျောင်းပြောင်းမိန့်ထုတ်ခဲ့တာဖြစ်ပြီး ဆရာမဒေါ်ဌေးဌေးဝေက ကျောင်းမပြောင်းတဲ့အတွက် သင်ကြားနေတဲ့ စာသင်ခန်းထဲက စာသင်ခုံတွေကို ဖယ်ရှားခဲ့ပါတယ်။

အဲဒီလိုဖယ်ရှားခဲ့တာကြောင့် ပထမတန်း ကျောင်းသား ကျောင်းသူ ၂၇ ဦး သမံတလင်းပေါ်မှာထိုင်ပြီး စာသင်ကြားနေရတဲ့ဓာတ်ပုံတွေကို လူမှုကွန်ရက်စာမျက်နှာပေါ်မှာ ဖော်ပြခဲ့တဲ့အတွက် ကျောင်းအုပ်ဆရာမကြီးက ဆရာမ ဒေါ်ဌေးဌေးဝေကို ပုဒ်မ ၄၄၇/၅၀၀ နဲ့ အမှုဖွင့်အရေးယူပေးဖို့ စစ်ကိုင်းအမှတ် ၁ ရဲစခန်းမှာ တိုင်ကြားထားပါတယ်။

ကျောင်းအုပ်ဆရာမကြီးရဲ့ တိုင်တန်းချက်အရ ကျောင်းသူ ၂ ဦးနဲ့ ကျောင်းသား ၂ ဦးကို အမှတ် ၁ ရဲစခန်းက သက်ဆိုင်ရာကျောင်းသားမိဘတွေကို အသိမပေးဘဲ ခေါ်ယူစစ်ဆေးခဲ့ပါတယ်။ ခေါ်ယူစစ်ဆေးခံရတဲ့ ကလေးမိဘတွေကလည်း မကျေနပ်ကြောင်း ဒီနေ့တွေ့ဆုံပွဲမှာ ပြောပါတယ်။

စစ်ကိုင်းမြို့ အမှတ် ၁ ရဲစခန်းက ဒုတိယရဲမှူး သိင်္ခ၀င်းက တော့ ကျောင်းသားတွေကို ကျောင်းချိန်အတွင်းမှာ ခေါ်ယူစစ်ဆေးတာဖြစ်တဲ့အတွက် မိဘတွေကို အသိမပေးခဲ့တာဖြစ်တယ်လို့ သတင်းမီဒီယာတွေကို ဖြေကြားပါတယ်။

"ဒီအမှုတည်ဆောက်တဲ့နေရာမှာ သက်သေကတော့ ဘယ်လိုပဲဖြစ်ဖြစ် မြင်တွေ့သမျှကို ပြောဆိုနိုင်တဲ့လူရှိရင် သက်သေခံသွင်းလို့ရတယ်၊ ကျနော်တို့က လက်ရှိကျောင်းအချိန်ဖြစ်တဲ့အတွက်ကြောင့် ကျောင်းအုပ်ကြီးကို ခွင့်တောင်းပြီးတော့မှ ခေါ်တာလေ၊ မိဘနဲ့မဆိုင်ဘူး၊ ကျနော်တို့အိမ်ကခေါ်တာမဟုတ်ဘူး၊ ကျောင်းကခေါ်တာ"

အပြန်အလှန်အားဖြင့် ဆရာမဒေါ်ဌေးဌေးဝေက မဟုတ်မမှန်တိုင်ကြားခဲ့တဲ့ ကျောင်းအုပ်ဆရာမကြီး ဒေါ်ထိုက်စံနဲ့ ဆရာမကြီးရဲ့ အဲဒီတိုင်တန်းချက်ကို ရေးသားဖော်ပြခဲ့တဲ့ဂျာနယ်နဲ့ သတင်းထောက်တစ်ဦးကို တရားစွဲဆိုသွားမယ်လို့လည်း ဆိုပါတယ်။
RFA Burmese